Ош: ипотекалык үйлөр каерде түшөөрү аныкталды


Ош шаарына ипотекалык багыттагы үй Курманжан Датка көчөсүнүн №121 дарегине түшөөрү пландалып жатат. Бул тууралуу «Т-Медиага» Ош регионалдык шаар куруу жана архитектура башкармалыгынын маалымат катчысы Адыл Акжол уулу билдирди. 

«Араван кичи районундагы №121 дарегиндеги муниципалдык жерге көп кабаттуу үй куруу пландалды. Ал жер АКБ Кыргызстан банкынын жанында жайгашкан. Азыр мамлекеттик каттоо кызматы аталган жер тилкенин мамлекеттик актысын тактап жатат. Качан аныкталып бүтөөрү азырынча белгисиз. Анткени жеке менчиктеги жерлер да курулушка кошулаары каралган«,-деди Адыл Акжол уулу.

Маалымат катчы кошумчалагандай, муниципалдык жер тилкесине көп кабаттуу үйдүн эскиздик долбоорун даярдоодо мамлекеттик акт китепчесиндеги жер тилкесинин аянт ченемдери туура эмес жана так даана көрсөтүлбөгөндүктөн конкреттүү иш алып барууга мүмкүн болбой жатат. Такталып бүтөөрү менен эле ипотекалык үйдүн эскиздик долбоору даярдала баштайт.

Он кабаттан турган үйлөр быйыл Тилекке Баатыр  жана Райымбеков көчөлөрүнө түшөөрү айтылган эле. Бирок курулуш түшчү жер такталбай иш артка сүрүлүп келүүдө. Жер маселесин үч күндө чечүүнү Ош шаарынын мэри Таалайбек Сарыбашов 23-августта тиешелүү кызматтарга тапшырган эле.
Үйлөрдүн курулушу былтыр берилип бүткөн ипотекалык батирлердин алгачкы төлөмдөрүнөн түшкөн акчанын эсебинен каржыланат.  150 батирлүү эки көп кабаттуу үй бүткөрүлсө, бюджеттик кызматкерлер гана эмес, төлөөгө шарты бар үйгө муктаждар да ипотекалык батир ала алат.  Ипотеканын шарттары мурдагыдай эле  6 пайыздык үстөк менен 12 жылга берилээри айтылган.

Автор жөнүндө

Тектеш материалдар

Пикир калтыруу

avatar
  Жазылуу  
Кабарлоо