Акыйкат издеп Баткенден Бишкекке жөнөгөн 62 жаштагы аксакал жөө жүрүшүн токтотту. Мындай билдирүүнү ички иштер министрлигинин маалымат кызматы таратты.
Маалыматта баласынын күнөөсүздүгүн далилдөө максатында жасаган жөө жүрүшүн аксакал бүгүн, 27-сентябрда токтоткону жазылат.
«Окуяны ички иштер министри Кашкар Жунушалиев өз көзөмөлүнө алды. Бул боюнча акыйкат издеп Бишкекке жөө жөнөгөн аксакалга билдирилди. Ошондон кийин Саидраим Абдилатов жөө жүрүшүн токтотту»,-деп айтылат маалыматта.
7 күн мурун Саидраим Абдилатов Баткенден Бишкек шаарына чындык издеп жөө жөнөгөн. Өзү жашаган Бужум айылынан жол тарткан аксакал учурда Кызыл-Кыяга жакындап калган болчу.
Окуяны 26-сентябрда Кыргызстандын акыйкатчысы болуп шайланган Токон Мамытов да өз көзөмөлүнө алаарын билдирген болчу.
Эскерте кетсек, 25-августтан 26на караган түнү Кызыл-Кыя шаарынын Караван айылында бир адамды автоунаа койдуруп кетип из жашырган. Кырсыкка шектелип Саидраим Абдилатовдун уулу 21 жаштагы Кимсанбай кармалган.
Аксакалдын билдиришинче, Баткен облусунун Кызыл-Кыя шаардык ички иштер башкармалыгы анын уулун бейкүнөө 2 айга камап койгон.
Оставьте первый комментарий