Лаура Швионтек: Кыргызстандын жаштары активдүү, жаңы нерселерге аракеттенген демилгелүү экен

Польшалык ыктыярчы Лаура Швионтекти Кыргызстандын тоолору өзүнө тарткан. Кооз жаратылышты сүйгөндүгү аны Кыргызстанга жетелеп келген.

Мындан алты ай мурун Ош шаарына келген Лаура учурда, жаштардын деңгээлин көтөрүү жаатында иш алып барат. Биз аны менен маектешип, кыргызстандыктардын жашоосу, жаштар тууралу сүйлөшүп, Оштуктардын жашоосун анын көзү менен баяндоого аракет кылдык.

Кыргызстанга кантип келип калдыңыз?

Фейсбуктан дүйнөдөгү жумуштарды издеп баштадым. “Erasmus+” программасынан бир нече өлкөнүн ичинен Кыргызстан да чыгып калды. Мурда бул Кыргызстан жөнүндө маалымат бар болгондуктан ойлонбой туруп тандадым. Анткени мага Кыргызстандын тоолору абдан жагат.

Учактан түшкөндө сизде кандай сезимдер болду?  Биринчи эле көзүңүзгө эмне учурады?

Алгач келип аэропортко түшкөндө эле мага 5-6 уюлдук телефондун  сим карталарын берип мени таң калтырышты. Чыгып баратканда эле «такси», «такси» деген топ адамдарга туш болдум.

Кыргызстандагы биринчи күнүңүздү азыр кантип элестетесиз?

Тамактанайын деп көчөгө чыгып такси чакыргам. Анан ал мен айткан даректи таппай башка жакка алып барып койгон. Картаны карап олтуруп, араң таап баргам. Ошто көбүнчө көчөлөр аталбайт экен, болжолдор аркылуу эле таап барышат экен.

Ош шаары эмнеси менен жакты?

Алгач мен Ошко келгенде зээригичтүү шаар болсо керек дегем. Көрсө жок, андай эмес экен. Эс алып, көңүл ача турган жерлер бар экен. Мага албетте табияты менен жакты, анан базарлары, майда манты жакты, бул жакта кечинде ресторандарга барганда элдер алкоголсуз деле бийлеше алат экен. Ошол жактары менен жакты.

А курут, кымыздар кычкыл болгондуктан мага бир аз жаккан жок

Бул жактагы эттер  Польшага караганда таттуурак экен. Таң калганым такси, тамактардын арзандыгы болду. 

Чет өлкөлүк үчүн  кыргызстандыктардын мүнөзү кандай сезилди?

Кыргыз эли меймандос, бирок алар кучакташып көрүшпөй болгону кол берип гана учурашышат экен. Анан чынында алар этти көп жеп, ар дайым жылмайып жүрүшөт. Мен кыргызча сөз айтсам алар жылмайышат. 

Сиздин өлкөңүз менен Кыргызстандын окшоштуктары?

Польшалыктар да орусча түшүнүшөт. Кээ бирки тамактары да окшошуп кетет. Дольма, манты тамактар бизде да бар.

Оштон сырткары Кыргызстандын кайсыл жерлеринде болдуңуз?

Алай, Сары — Челек, Өзгөн, Жалал — Абад, Ленин чокусунда жана Бишкекте болгом. Ленин чокусу тоо болгондуктан, менин абдан жакшы көргөн жерим.

Канча убакытка келдиңиз?

2019-жылы май айында келгем, 2020-жылдын майына чейин болом. Бирок андан кийин дагы бир ай бул жакта саякаттоо үчүн калам деп жатам.  

Буга чейин эмне иштерди кылгансыз?

Польшада экономика жаатында магистратураны аяктагам. Ошол убактарда эле ыктыярчылык менен алектенчүмүн. Организацияларда координатор болуп, жаштар менен долбоорлорду ишке ашырчумун. Банк сферасында алты ай иштегенмин.

Польшадагы жаштар менен кыргыз жаштарынын айырмачылыгы жана окшоштугу ?

Кыргызстандын жаштары аябай активдүү, жаңы нерселерди кылганы аракет кылган демилгелүү экен. Мисалы Польшада жаштар көбүрөөк көңүл ачканды жактырышат. А бул жакта ал нерсеге азыраак басым жасашып, чет өлкөлөргө чыгууга аракеттенишет экен. Бирок алар толугу менен ачылыша албагандай, жүрөгүндөгү нерсени айткандан тартынышат, же уялышат. 

Алдыда бул жакта көптөгөн жаштардын потенциалын жогорулатууга салым кошуп, жумушумду ийгиликтүү бүтүп, дагы да кыргыз жерин кыдыргам.

Кыргызстанга кийинки жолу келсем, жумуш боюнча эмес, эс алганы саякатчы катары келгим келет. Анткени жумуш менен болуп, саякатка көп жетишпей калам. Кыргызстанды кеткенден кийин ар дайым сагынам го деп ойлоп жатам.

 

Т-медиа
Автор Т-медиа 5130 статей

Пикир калтыруу

avatar
  Жазылуу  
Кабарлоо