Ош шаардык мэриясы Аскар Шакиров көчөсүндөгү көрүстөндү сүрдүрүп, ордуна көп кабаттуу ипотекалык үй курууну пландап жатат. Бирок буга жергиликтүү тургундар каршы чыгышууда.
Курулуш курула турган жер «тажик көрүстөнү» деп аталат. Маалыматтарга караганда, ал жер 50 жылдан бери иштетилбей келет.
«Курманжан Датка» аймактык башкармалыгынын башчысынын орун басары Жылдызбек Сактанов «Т-Медиага» билдиргендей, мүрзө көп жылдан бери иштетилбей бош тургандыктан шаар бийлиги көрүстөн жайгашкан жерге ипотекалык үй курууну көздөөдө.
«Мечиттен уруксат алып, кат алганбыз. Бул жердин бузулуп жатканынын себеби мүрзөгө элүү жыл мурун адам коюлган. Мусулманчылыкта деле мыйзамда деле 20 жылдан кийин салса болот. Бул жерге жеке менчик эмес, шаардык мэриянын ипотекалык үйү салынат. Элге түшүндүрүү иштерин жүргүзгөнбүз. Санитардык жактан атайын адистер келип, өздөрү сөөктөдү казып алат. Эгерде тургундар ата-бабаларыбыздын сөөктөрү бар эле деп алып кете турган болсо, мэрия жардам берип каржылыгын көтөрөт», -деди Жылдызбек Сактанов.
Жашоочулардын бири Гүлзат Матазимованын айтымында, үйлөр менен көрүстөндүн аралыгы 50 метрге да жетпейт. Мындан улам сөөк казуу иштери жүрсө, тургундардын ден соолугуна да зыян келиши мүмкүн.
«Үй салганы мүмкүн эмес. Канча сөөк бар бул жерде. Аларды аңтарып казуу иштери болсо, вирустар болушу да мүмкүн. Канчалаган адам жашайбыз бул жерде. Зыян тиет. Уруксат бербейбиз. Каршыбыз. Себеби ыйык дагы жер. Арбактардын үйү бул жер», -дейт жашоочу.
Ал эми «ИнтерБилим» коомдук уюмунун Оштогу өкүлү Гулгакы Мамасалиеванын пикиринде көрүстөндүн ордуна үй куруу туура эмес.
Оставьте первый комментарий