Жапаров менен Эрдогандын жолугушуусу. Орхан Инандынын жоголушу боюнча сөз болду

Сүрөт: Султан Досалиев

Президент Садыр Жапаров Түркиянын лидери Режеп Тайып Эрдоган менен жолукканда андан Орхан Инандынын Кыргызстанда жоголушу боюнча сурады. Бул тууралуу кыргыз президентинин басма сөз катчысы Эрбол Султанбаев журналисттердин суроосуна жооп берип жатып билдирди.

«Президент Садыр Жапаров кесиптеши Режеп Тайып Эрдогандан Орхан Инандынын Кыргызстанда жоголушу боюнча сурады. Режеп Тайып Эрдоган аны тааныбастыгын, ал жөнүндө маалыматы жоктугун, ФЕТОчулар боюнча билгиси да келбесин айтты», — деди Султанбаев.

9-июнда Режеп Эрдоган Кыргызстандын президенти Садыр Жапаров менен биргелешип өткөргөн маалымат жыйынында «ФЕТО баш болгон террордук уюмдарга каршы күрөшүү жана чөлкөмдөгү кызматташтык сыяктуу маселелерди талкууладык» деп билдирген.

«ФЕТО уюмунун эки өлкөнүн улуттук коопсуздугуна коркунуч келтирери тууралуу урматтуу бир тууганым менен пикирдешпиз. Соңку саясий көйгөйлөр ФЕТОнун караңгы, кандуу жана суук «жүзүн» ортого салды. Буюрса, бири-бирибизге колдоо көрсөтүп, бул маселени бирге жеңебиз. Урматтуу президентке Түркиянын кыргыз элине жана өкмөтүнө болгон колдоосун дагы бир жолу баса белгиледим. Саясий туруктуулукка карай жасалган ар бир кадамында биз кыргыз мамлекетинин жанындабыз», — деген Эрдоган.

Орхан Инандынын уурдалышы

59 жаштагы Орхан Инанды 1-июнга караган түнү жоголгон. Анын эшиги ачык калган автоунаасы өзү жашаган үйдүн короосунан табылган. Милицияга арызды анын уулу жазып, акыркы жолу атасы байланышка 31-майдын кечинде чыкканын, ошо бойдон дайынсыз экенин айткан.

2-июнда ИИМ Инандынын жоголушу боюнча «Адам уурдоо» беренеси менен кылмыш иши козголгонун билдирген. Ведомство аталган иш бюнча сотко чейинки өндүрүш иштери ички иштер министри Улан Ниязбековдун жеке көзөмөлүндө экенин белгилеген.

6-июнда Орхан Инандынын жубайы видеокайрылуу аркылуу анын жолдошу Бишкектеги Туркия элчилигинин имаратында кармалып тургандыгы тууралуу маалыматы бар экендигин айткан. Анын айтымында, жолдошун Түркияга депортациялай турган болсо, «анын өмүрүнө коркунуч туулат».

Кыргызстанда 20га жакын «Сапат» жеке лицейинин, эл аралык «Ала-Тоо» университетинин негиздөөчүлөрүнүн бири Орхан Инандынын теги түркиялык. Ал Бишкекте иштеп, Кыргызстандын жарандыгын алган.

Т-медиа
Автор Т-медиа 5129 статей

Пикир калтыруу

avatar
  Жазылуу  
Кабарлоо