Борбордук шайлоо комиссиясы Жогорку Кеңешке шайлоодо бир мандаттуу округ боюнча автоматтык урна системасы (АСУ) эсептеген алдын ала жыйынтыктарды жарыялады.
Ага ылайык, Баткен облусундагы №1 Лейлек шайлоо округунан добуштардын 53.03 пайызы эсептелди. Талапкер Чыңгыз Ажибаев 4 015 добуш (25.42 пайыз) алып, азырынча алдыда келе жатат. Аталган округдан бардыгы тогуз талапкер аттанган. Округдагы шайлоочулардын саны — 90 075. Бул округга Сүлүктү шаары толугу менен кошулат. Лейлек районунун Исфана шаары жана бардык айыл аймактары кирет.
Ал эми №3 Кадамжай шайлоо округунда добуштардын 63.89 пайызы эсептелип, талапкер Ырысбек Атажанов 3 199 добушка (13.77 пайыз) ээ болуп, алдыда келе жатат. Бардыгы он талапкер аттанган. Округдагы шайлоочулардын саны — 112 968. Ага Кызыл-Кыя шаары толугу менен, Кадамжай районунун Кадамжай, Айдаркен шаарлары, Бирлик, Үч-Коргон, Чаувай, Абсамат Масалиев, Майдан, Марказ, Орозбеков, Көтөрмө айыл аймактары, Алга айыл аймагынын №8147 шайлоо участкасы биригет.
№2 Баткен шайлоо округунан болсо добуштардын 71.25 пайызы эсептелип бүттү. Депутаттыкка талапкер Нурлан Ражабалиев 4 685 добуш (18.38 пайыз) алып азырынча алдыга чыкты. Округдагы шайлоочулардын саны — 102 010. Баткен району жана Баткен шаары толугу менен, Кадамжай районунун Халмион, Совет, Кыргыз-Кыштак, Ак-Турпак айыл аймактары, Алга айыл өкмөтүнүн №8145, 8146, 8172, 8202 шайлоо участкалары кирет.
Белгилей кетсек, бул автоматтык эсептөө урнасынын гана жыйынтыгы. Эми БШК добуштарды кол менен санап, акыркы жыйынтыкты 18-декабрга чейин чыгарат.
Бүгүн, 28-ноябрда парламенттик шайлоо болуп өттү. Эрте менен саат сегизде ачылган добушканалар кеч 20:00дө жабылды. БШК азырынча канча адам добуш бергени тууралуу соңку, саат 20.00гө карата маалыматтарды бере элек.
Саат 18:00гө карата добуш бергендердин саны 28,36% болгон. Ал эми бир мандаттуу округдарда бул көрсөткүч 28,66% түзгөн.
Жогорку Кеңешке шайлоого 21 партиядан 1004 талапкер ат салышты. Ал эми бир мандаттуу округдардан катышып жаткан 282 талапкердин 36сына мандат берилет. Жалпысынан Жогорку Кеңешке 90 депутат шайланат.
Оставьте первый комментарий