Ош шаарында жеке ишкерлердин сунушу менен окуучуларды кечкисин акысыз ташыган 10 кичи автобус ишке киргени жатат. Бул тууралуу вице-мэр Сонунбек Жунусбаев кечээ, 9-декабрда коомдук транспортторго рейд учурунда билдирди.
Анын айтымында, маршруттук каттамдар кыш мезгилинде — декабрь, январь жана февралда окуучуларды акысыз ташыйт. Алар 13-декабрдан иштей баштайт.
«Мектеп окуучулары үчүн жол акы өзгөрүүсүз калышы керек. Саат 19:00дөн кийин 10 сом алганы болбойт. Кээде айдоочулар беш сомдон кызганып окуучуларды албай коюп жатыптыр. Ошон үчүн кечээ (ред- 8-декабрда) ишкер балдар өздөрү «Кеч калган окуучуларды кыш мезгилинде үч ай акысыз ташып беребиз» деп келишти. Алар дүйшөмбүдөн каттамга чыгат» — деди Жунусбаев.
Ош шаарында 1-декабрдан баштап калаадагы коомдук транспортко жол кире кымбаттаган. Ага ылайык, маршруттук кичи автобустарда жүрүү акысы — 15 сом. Кечки саат жетиден кийин жүргүнчүлөр 20 сомдон төлөйт. Ал эми троллейбуста жана автобуста жүрүү акысы мурдагыдай 10 сом (электрондук картасы барларга 6-8 сом) бойдон калды. Окуучулар үчүн да тартиф жогорулаган жок. Тагыраагы 5 сом бойдон калды.
Оставьте первый комментарий