Бишкек шаарынын Биринчи май райондук соту бүгүн, 11-январда саясатчы Бактыбек Калмаматовдун жактоочусунун арызын карады. Бирок, жактоочу А.Т.нын УКМКнын тергөөчүсү тарабынан Калмаматовго карата кабыл алынган токтомдорду жокко чыгаруу тууралуу даттануусу канааттандыруусуз калтырды.
«Анткени, Кылмыш-жаза процессуалдык кодексинин 30-беренесине ылайык, тергөөчүнүн токтомун жокко чыгаруу маселесин кароо тергөө судьясынын ыйгарым укуктарына кирбейт», — деп айтылат маалыматта.
Бакытбек Калмаматов 9-февралга чейин камакка алынган. Баш коргоо чарасы 24-декабрда Бишкектин Биринчи май райондук сотунда каралган.
Ага карата «Расалык, этностук, улуттук, диний же региондор ортосундагы кастыкты (араздашууну) козутуу» беренеси менен айып коюлууда.
Калмаматов УКМК тарабынан 22-декабрда «Манас» эл аралык аэропортунда Сауд Арабияга бара жатканда кармалган.
Мурдагы депутат быйылкы парламенттик шайлоого «Азаттык» партиясынын тизмеси менен катышкан. 11-январда өткөн президенттик шайлоого да талапкерлигин койгон.
Оставьте первый комментарий