23-августтун таңында социалдык тармактарда «Кемпир-Абадды коргоо» комитетинин мүчөлөрүнүн үйү тинтүүгө алынганы кабарланды. Азыркы тапта активист Гүлнара Журабаева, Рита Карасартова, Эрлан Бекчороев, Перизат Суранова, Асия Сасыкбаева, Жеңиш Молдокматов, Улукбек Маматаев, Али Шабдан, саясатчылар Клара Сооронкулова, Бектур Асанов, Кеңешбек Дүйшөбаев, Улукбек Маматаев, Кубаныч Кадыров, Равшан Жээнбековдордун үйү тинтүүгө алынганы айтылууда.
Жарандык активист Эрлан Бекчоро анын үйүнө дагы милиция тинтүүгө келгенин жазды.
Гүлнара Журабаева тинтүү жүргүзүлгөнүн активисттердин Кемпир-Абад суу сактагычынын Өзбекстанга берилишине каршы болгону жана аны коргоо боюнча комитет түзгөнү менен байланыштырды.
Жарандык активист Атай Бейшенбек «Фейсбуктагы» баракчасына Кемпир-Абаддын берилишине каршы чыккан саясатчылардын үйү тинтилип жатканын жазды.
«Туран» партиясынын төрагасы Жеңиш Молдокматов «Фейсбуктагы» баракчасында түз эфирге чыгып, үйүнө тинтүү жүрүп жатканын кабарлады.
Саясатчы Равшан Жээнбеков да үйү тинтилгенин айтты.
Адвокат Чынара Жакупбекова «Фейсбук» баракчасына Клара Сооронкулованын үйү тинтүүгө алынып жатканын айтып, видеосун чыгарды.
Активист Рита Карасартова дагы түз эфирге чыгып, үйүн тинткени келген төрт киши эч кандай документ көрсөтүшпөгөнүн жана аны кармаганы жатышканын айтты.
Ички иштер министрлиги тинтүүлөр тууралуу азырынча расмий маалымат бере элек.
Бир күн мурда Равшан Жээнбеков 15-октябрда Өзгөндө өткөн Курултайдын резолюциясына ылайык «Кемпир-Абадды коргоо» комитети түзүлгөнүн билдирген. Ага саясатчылар, саясий уюмдар, активисттер, саясий кыймылдар мүчө болушкан.
Кемпир -Абад: Өзгөндөгү жөө жүрүш, курултай
21-октябрда Ош облусунун Өзгөн районундагы Куршаб жана Кызыл-Октябрь айылдарынын тургундары Кемпир-Абад суу сактагычына байланыштуу жөө жүрүш өткөрүштү. Алар колдоруна «Кемпир-Абад калсын!», «Кемпир-Абад берилбесин!», «Кемпир-Абад түштүктүн Ысык-Көлү!» деген жазууларды, Кыргызстандын желегин көтөрүп чыгышкан.
20-октябрда президент Садыр Жапаров, УКМКнын Камчыбек Ташиев баш болгон бийлик жетекчилери Кемпир-Абад боюнча жарандык активисттер, жергиликтүү тургундар менен Бишкекте, президенттик администрациянын имаратында жабык жыйында жолугушкан.
Президенттин катышуусундагы ушундай эле жабык жыйын 4-октябрда Өзгөн районунда болгон.
15-октябрда Өзгөндө Кемпир-Абад суу сактагычына байланыштуу элдик курултай өтүп, ага бир катар оппозиционер саясатчылар катышкан. Курултай өткөн Кызыл-Октябрь айылынын эки аксакал тургуну 18-октябрда райондук милицияда суракка чакырылганы айтылган. Суу сактагыч өзбек тарапка өтүп кетиши ыктымал деген кооптонуусун айткандар Кызыл-Октябрь айылында былтыртан бери нааразылык акцияларын өткөрүп келе жатышат.
10-октябрда Жогорку Кеңештин Эл аралык иштер, коргоо, коопсуздук жана миграция боюнча комитети кыргыз-өзбек чек арасы, анын ичинде Кемпир-Абад суу сактагычы боюнча эки тараптуу келишимдин долбоорун карап, көпчүлүк добуш менен жактырган.
Президент Садыр Жапаров 9-октябрда «Кабар» агенттигине курган маегинде да кыргыз-өзбек чек арасы, Кемпир-Абад маселеси тууралуу суроолорго жооп берип жатып, талаш жерлердин дээрлик 99% Кыргызстанга өткөнүн билдирген.
22-октябрда мамлекет башчысы кыргыз-өзбек чек ара маселеси боюнча дагы түшүндүрмө берди. Жапаров Кемпир-Абад суу сактагычынын айланасындагы маселелерге кеңири токтолуп, чагымчылдар элге туура эмес маалымат берип жатканын билдирген. Ал 1965-жылы Өзбекстан суу басып калган жердин ордуна компенсация катары берген 4127 гектар жерге кайсы айылдар салынганын тизмектеген. Ошондой эле Кемпир-Абад суу сактагычынын суусу кургап кетпестигин айтып, 70 жылдан бери суу басып жатканын белгиледи.
Садыр Жапаров келишимдер Жогорку Кеңеште ачык караларын, элдин 99% кыргыз-өзбек чек арасы боюнча келишимди колдой турганына ишенерин кошумчалаган.
Ал эми Улуттук коопсуздук боюнча мамлекеттик комитеттин төрагасы Камчыбек Ташиевдин айтымында, келишим ратификация болсо, Кемпир-Абад суу сактагычы жайгашкан 4485 гектар жер Өзбекстанга өтөт. Кошуна өлкө сууну бууп турган дамбага да ээлик кылат. Мурда кыргыз-өзбек чек арасы суу сактагычты бөлүп өтүп турган. Атайын кызматтын башчысы Кемпир-Абаддагы сууну сегиз адамдан турган кыргыз-өзбек биргелешкен ишканасы көзөмөлдөй турганын айткан. Суунун деңгээлин 908 горизонталдан 900гө түшүрүүдө 1246 гектар жер бошоп, аны жергиликтүү тургундар колдонсо болорун кошумчалаган.
Оставьте первый комментарий