Кыргызстандын эмгек сиңирген артисти, актер Азиз Мурадилаев каза болду. Бул тууралуу 17-декабрдын кечинде алып баруучу Ассоль Молдокматова актердун жубайына шилтеме берип «Фейсбук» баракчасына жазды.
Үч күн мурун маркум видеокайрылуу жасап, анда ага донор таежеси боло турганын жана Түркияда жасала турчу операция башка өлкөдө жасалмай болгондугун айткан эле. Ал даарыланууга акча чогултууга жардам көрсөткөн кыргызстандыктарга ыраазычылык билдирген.
Мурадилаев көптөн бери боор циррозу менен ооруп келген. Буга чейин ал Бишкектеги ооруканага түшкөн. Актер тез арада боорун алмаштыруу операциясына муктаж болуп турганын 4-декабрда Ассоль Молдокматова билдирген. Ал Мурадилаевдин жакындарынын 45 миң доллар турган операцияга каражаттары жетпей жатканын айткан. Бир күн ичинде элден 1 миллион 21 миң сом чогулган. Ошол эле күнү президент Садыр Жапаров Мурадилаевге 42 миң доллар бөлүп берген.
Актер 44 жашта болчу. Акыркы жылдары Токтоболот Абдымомунов атындагы Кыргыз улуттук драма театрында эмгектенип келген. Тасмаларда да башкы ролдорду ойноп, Садык Шер-Нияздын «Курманжан Датка» тарыхый-көркөм тасмасында Алымбек датканын ролун аткарган.
«Т-Медианын» жамааты Азиз Мурадилаевдин жакындарына терең кайгыруу менен көңүл айтат.
Оставьте первый комментарий