Баткенде 3 автобус каттамга чыкты. Алар кандай линия боюнча каттайт?

Баткен шаарында жаңы автобустардын үчөө каттамга чыгарылды. Бул тууралуу калаа мэриясынын маалымат кызматы билдирди. 

Жол акысы чоңдор үчүн 15 сом, жаш балдар үчүн 10 сом. Автобустар төмөнкү линиялар боюнча каттайт:

• Салихов көчөсүнөн — Чет-Булак кварталына (С.Огата мектеби, «Айгүл-Таш» подстанциясы) чейин, андан соң Сайдиман ажы көчөсүнөн мал базарга чейин каттам барат;
• К.Турмаматов көчөсүнөн кайтып, Раззаков көчөсүндөгү Ак-Ташка чейин барат;
• Т.Садыков көчөсүнөн Жибек жолу көчөсү аркылуу И.Жусупов көчөсүнө барып, Салихов көчөсүнөн «Биримдик базарына келип токтойт.

Калган 3 автобустардын лицензиялары даяр болуп, уруксат берилгенден соң каттамга чыгат.

Быйыл Баткен шаарына биринчи жолу 6 автобус алынган. Алар Айыл банк тарабынан лизингдик негизде ар бири 3 млн. 71 миң сомдон бааланган. Калаа мэриясы бул автобустардын акчасын 6 жылда бөлүп төлөйт. Бирок Баткен шаарынын көчөлөрү жаңы автобустарга ылайыкташпаганы айтылган эле. Мындан улам, көчөлөрдү кеңейтип, аялдамаларды оңдоо иштери башталган.