Ички иштер министрлиги мурдагы вице-премьер-министр Жеңиш Разаковдун кармалышы боюнча маалымат таратты. Анда Разаков алдоо жолу менен 1 млн АКШ долларын алууга шектелип жатканы айтылат.
Маалыматка караганда, Жеңиш Разаковдун үстүнөн былтыр 20-сентябрда арыз түшкөн.
«Жабырлануучу 2017-жылдын ноябрь, декабрь айларында кызмат абалынан пайдалануу менен анын ишенимине кирип, ишкердик жүргүзөбүз деп 1 млн АКШ долларын алып бербей койгондугун билдирген» — деп айтылат маалыматта.
Бул факты боюнча 1-октябрда Кылмыш-жаза кодексинин алдамчылык беренеси менен иш козголгон. 24-январда Жеңиш Разаков кармалып, Бишкек милициясынын убактылуу кармоочу жайына киргизилген.
Учурда ага «Алдамчылык» жана «Кызмат абалын кыянаттык менен пайдалануу» беренелери боюнча айыбы угузулду. 26-январда Биринчи май райондук сотунда анын баш коргоо чарасы аныкталып, 24-февралга чейин №1 тергөө абагына камакка алынды.
Оставьте первый комментарий