Кыргызстандагы ЖМКлар менен жарандык коом өкүлдөрү Европа Биримдигине жана өнүктүрүү боюнча башка өнөктөштөргө кайрылуу жолдоду.
Алар Caucasus Open Space (COS) маалымдагандай, 2023-жылдын 2-мартында Грузия парламентинин эки комитетинин биргелешкен жыйынында чет элдик агенттер жөнүндө мыйзам долбоорунун эки варианты жактырылганын белгилешкен.
Төмөндө кайрылууну толугу менен жарыялайбыз:
ЖМКлар жана окуянын күбөлөрү грузин парламентинин комитеттеринин жыйыны кастык кырдаалдан улам жарандык коом уюмдарынын жана көз карандысыз маалымат каражаттарынын өкүлдөрүнүн кеңири катышуусуз өткөнүн белгилешүүдө. Мыйзам чыгаруучулар өлкөнүн 400 уюмунун бул мыйзам долбоорду кабыл алууга каршы коюлган колдорун, кайрылууларын эске алышкан эмес. Мындан улам өткөн тынчтык акциясынын кеминде 36 катышуучусу укук коргоо органдары тарабынан кармалган.
Мыйзам долбоорун изилдеген эксперттер, бул ченемдер адамдын фундаменталдык укуктарын, анын ичинде нааразылык билдирүү жана жеке кол тийбестигин бузуп, басмырлоочу эрежелерди киргизип жатканын баса белгилешет.
Биздин грузиялык өнөктөштөр бул мыйзам чыгаруу демилгеси жана 2-мартта болгон окуялар адам укуктарынын одоно бузулушунун башталышынан кабар берет деп эсептешет.
Бир нече ондогон жылдар бою Грузиянын карапайым жарандары, жарандык активисттери, саясатчылары жана мамлекеттик кызматчылары мамлекетти европалык мейкиндикке интеграциялоо боюнча чоң иштерди аткарышты. Буга байланыштуу Грузияга Евробиримдикке талапкер статусун берүү маселеси каралды. Биздин грузиялык өнөктөштөр бул маселе чечилбесе, алардын мамлекети авторитардык таасирге көбүрөөк дуушар болот деп эсептешет.
Грузия жана Кыргызстан сыяктуу демократиялык өнүгүүнүн реалдуу мисалдары бүткүл постсоветтик аймактагы прогрессивдүү күчтөрдүн көтөрүлүшү үчүн маанилүү. Алар прогрессивдүү мамлекеттер менен бирге авторитардык коррупциялык режимдер жалгыз жол эмес экенин жана алар менен күрөшүүнүн мааниси бар экендигинин жандуу далили.
Ушуга байланыштуу биздин мамлекеттерде демократияны жана адам укуктарын коргоо Европа Биримдиги үчүн альтернативалуу экономикалык коридорлордун аймагында демократияны, адам укуктарын, туруктуулукту жана коопсуздукту сактоо жана өнүктүрүү, глобалдык коопсуздукту камсыз кылуу үчүн өтө маанилүү.
Постсоветтик аймактагы бир нече ондогон жылдарга созулган салыштырмалуу туруктуулуктан кийин айрым саясий күчтөр жана таасирдүү оюнчулар өлкөлөрдү жана элдерди өздөрүнүн таасир чөйрөсүнө жана авторитардык өткөнүнө кайтаруу аракетин көрүшүүдө. Бүгүнкү күндө демократия жана адам укуктары массалык системалык чабуулга дуушар болууда. Биз эл аралык коомчулуктун колдоосуна мурда болуп көрбөгөндөй муктажбыз.
Кыргыз Республикасынын Медиа аракет платформасы жана жарандык коом уюмдары грузин кесиптештеринин позициясын бөлүшөт жана эл аралык стратегиялык өнөктөштөрдү Грузия менен Кыргызстанда кыйынчылык менен жеңип алынган демократиялык жана адам укуктарын коргоо үчүн зарыл колдоо көрсөтүүгө жана чукул чараларды көрүүгө чакырат.
Грузиядагы кесиптештерибизге колдоо иретинде биз төмөнкүлөрдү суранабыз:
— Грузияга ЕБге талапкер статусун берүү боюнча сүйлөшүүлөрдү тездетүү үчүн жарандык сектордогу грузин өнөктөштөрүн колдоо;
— Грузияда жана Кыргызстанда эркин жарандык коомду жок кылууга багытталган мыйзам долбоорлорун кабыл алууга каршы аракеттенүү боюнча демократиялык күчтөрдүн аракеттерин колдоо планын камсыз кылуу.
Кыргыз Республикасынын жарандык коомунун өкүлдөрү катары биз Грузиянын жарандык секторундагы өнөктөштөрүбүздү бекем колдой тургандыгыбызды билдиребиз. Биз сиздерди Грузия менен Кыргызстандагы демократиялык жетишкендиктерди сактап калуу үчүн колдон келгендин баарын кылууга чакырабыз.
Оставьте первый комментарий