«Кнопкам басылбай калыптыр». Сөзү менен күлкү болгондор

"Кнопкам басылбай калыптыр", "Эмне сиз отвечаласызбы?"

Аткаминерлердин жыл ичинде шакаба болгон пикирлери

Быйыл деле тамаша сүйүүчүлөрүн депутаттар менен бийлик өкүлдөрү зериктирбеди окшойт. T-Media бир жыл ичинде ким, кайсы сөзү менен соцтармакта популярдуу болгонун топтоштурду.

"Төлөй албасак өлөлүбү?"

Министрлер кабинетинин төрагасы Акылбек Жапаровдун бул сөзу кулакка сиңип калды окшойт. Анын мынтип кимге жооп бергени эсиңиздердеби? Жапаров депутат Адахан Мадумаровдун "Кыргызстанда пенсия, жөлөк пулдар жашоо минимунан кем болбошу керек эле" деген суроосуна ушундай реакция кылган.

Конституцияга жашоо минимунан кем болбосун деп жазылып калган (пенсия, жөлөк пулдар). Ошону чечмелеп берүүнү сурап Конституциялык сотко кайрылдык.

- Конституциялык сотко кайрылуунун кажети жок. Ал жерде "төлө" деп турат. Бүттү.

- Төлөй албасак өлөлүбү эми?

- А?

- Төлөбөсөк өлүп калалыбы эми?

Акылбек Жапаров

Министрлер кабинетинин төрагасы

«Садыр ава» дейинби же «аба» десем болобу?

Быйыл депутат Айбек Осмонов алфавитке жаңы тамга сунуштаган эле. Унутпаган болсоңуз, эл өкүлү "Садыр аба" деп жазыш үчүн "w" тамгасы керек болуп жатканын айткан болчу.

"Көлдө шортачан жатканыңарды көрбөйүн"

Бул жылы УКМК төрагасы Камчыбек Ташиевдин министрлерден жумушту саат алтыда баштап, жайында болсо эс алууга барбай иштөөнү талап кылганы көп талкуу жаратты.

"Дагы талтайды дейт"

Жылдын соңунда депутаттардан туунун өзгөрүүсү боюнча пикирин угуу кыйын болду. Же президентти же элди тандай албай эки ортодо тургандардын бири Балбак Түлөбаев болчу. Анын "Эми дагы талтайды дейт" деген сөзүнүн да жөнү бар.

Эми мени "Дагы талтайдың" деп урушат болуш керек. Мен президенттин тарапташымын. Позициядагы депутатмын. Бирок эл бул маселеде "добушуңду бербе" деп айтты. Мен элди уктум, добушумду берген жокмун.

Балбак Түлөбаев

Жогорку Кеңештин депутаты

"Бензиниң түгөнсө деле кызыл жанат"

Негизи быйыл желек темасы депутаттарды көп сөзгө калтырды. Анын түсүн да жаңылагысы келген эл өкүлдөрү болду. Айрыкча Жусупбек Коргонбай уулунун кызыл түс эмнеге начар экенин түшүндүргөнү аны шакабага калтырды окшойт.

Башында эле туура эмес кылып койгон экенсиңер да. Башка эле түстө кылсаңар болмок экен. Көк асабабы же жашылбы. Кызылды өзүңүздөр билесиздер, жол чыракка токтосоңуздар деле кызыл, бензиниң түгөнсө деле кызыл жанат. СССР 70 жыл башкарды, кызыл желеги бар эле, аягы талкаланып жок болду. Бир олуттуу желек кабыл албаган экенсиңер.

Жусупбек Коргонбай уулу

Жогорку Кеңештин депутаты

"Эмне сиз отвечаласызбы?"

Жогорку Кеңеште айрым көчө сөздөрү айтылып кеткен учурлар да жок эмес. Быйыл малга салык салууну сунуштап таанылган Жеңишбек Токторбаев өзү демилгелеген мыйзамдардын бирин талкуулап жатканда кесиптеши менен айтышып калган эле. Анын "башкаларды үндөбөңүз, сиз эмне отвечаласызбы?" деген сөзү депутаттардын деңгээлине байланыштуу турдүү пикирлерди жараткан.

Элмурза Ракиевич өзүнүн шкурасын ойлоп жатса керек. Добушка коёлу өтсө өттү, өтпөсө эч кандай маселе жок. Элмурза Ракиевич, сиздин каршы бергиле деп айтканга укугуңуз жок. Бардык депутаттарга сиз жооп бересизби? Сиз отвечаласызбы?

Жеңишбек Токторбаев

Жогорку Кеңештин депутаты

"Кнопкам басылбай калыптыр"

Социалдык тармакта туу боюнча мыйзамга добуш бербей калган депуттаттардын кылыгы да кызуу талкууланып жатат. Колдонуучулар муну мектептеги сабакка келбей калган же сабак аткарбаган окуучулардын абалына окшоштурган.

"Эки жүздүү болбойлу"

Биз жылдык топтомубузду ушулар менен жыйынтыктадык.Баарын камтый алган жокпуз,негизи эле жыл ичинде мындай шакабага алынган учурлар арбын эле болду. Соңунда шылдың болгон эмес, көпчүлүктүн алкоосун алган пикирди эстеткибиз келип жатат. Быйыл Кыргызстанда экинчи жолу курултай өтүп, андагы делегаттардын бири элге мынтип кайрылган.

А сиздин эсиңизде кандай сунуш же сөздөр калды? Быйыл кимдин пикирлерин көп талкууладыңыз? Материалга пикир калтырсаңыз болот.