Арстанбап айылында болгон селдин себептери боюнча текшерүү жүргүзүлүп, жыйынтыгында бир катар мамлекеттик кызматкерлерге кылмыш иши козголду. Бул тууралуу 15-октябрда Башкы прокуратура кабарлады. 

Маалыматка караганда, Арстанбап айыл өкмөтүнүн жана "Кадастр" мамлекеттик мекемесинин Базар-Коргон филиалынын кызмат адамдары 2006-2019-жылдары суу коргоо зонасында жайгашкан 15 жер тилкени мыйзамсыз жеке менчикке берип жибергени аныкталган. Андан кийин Арстанбап-Сай дарыясынын жээгине бир катар соода объектилер курулган. Муну менен мамлекетке жана жеке жактарга 24 млн сомдон ашык зыян келтирилген.

Бул иш боюнча Базар-Коргон райондук прокуратурасы Кылмыш-жаза кодексинин 337-беренеси ("Кызмат абалынан кыянаттык менен пайдалануу") менен кылмыш ишин козгогону айтылды. Бирок Башкы прокуратура айып тагылган кызмат адамдарынын аты-жөнүн ачыктаган жок.

Үстүбүздөгү жылдын 23-июлунда Жалал-Абад облусунун Базар-Коргон районундагы Арстанбап айылында сел жүргөн. Табигый кырсык 23 унааны агызып, тогуз турак үйгө, борбордук ооруканага суу кирген.