Бүгүн, 27-ноябрда Ошто шаардык кеңешине жаңы шайланып келген депутаттарга мандат бөлүштүрүлүп жатат. Сессияда төрага да шайланат. Бул тууралуу мэриянын басма сөз кызматы билдирди.

Борбордук шайлоо комиссиясынын 25-ноябрда жарыялаган протоколуна ылайык, "Жаңы Кыргызстан" партиясына 22, "Ынтымака" 10, "Мураска" 8, "Милдетке" 6 жана "Бир Бол" саясий партиясына беш мандат берилген.

Кыргызстанда 17-ноябрда жергиликтүү кеңештерге шайлоо 33 шаарда жана 231 айылдык кеңеште өттү.

Жалпы шаардык кеңештердеги миңдей мандат үчүн беш миңдей талапкер ат салышты. 231 айылдык кеңештин депутаттыгына 10 миңдей жаран талапкерлигин койгон.