Чүй облустук ички иштер башкармалыгы медицина кызматкерине кол көтөргөн жаран кармалганын маалымдады. Бул факт боюнча бейбаштык беренеси менен кылмыш иши козголгон.

Мекеменин маалыматына караганда, окуя 19-августта саат 04:00дө жандандыруу бөлүмүндө болгон. Саат 01:00дө 21 жаштагы кыз ооруканага "алкоголго ууланып" түшкөн. 

Ал 3 сааттан кийин өзүнө келип, бейтапканадан кетүүгө аракет кылган. Бирок дарыгерлер аны туугандары келмейинче чыгара албастыгын айткан. Бейтап буга ачууланып, дарыгер-реаниматологду ур-токмокко алып, андан соң ооруканадан чыгып кеткен.