Ички иштер министрлиги Ош облусунун Кара-Суу районунун сот аткаруучусу 20 миң сом  алып жаткан жеринен кармалганын кабарлады.

Маалыматка караганда, Ош облустук ички иштер башкармалыгына Кара-Суу районунун тургуну арыз менен кайрылган. Анда 2023-жылын 23-декабрынан тартып, сот аткаруучу Кыргызстандын  чек арасынан өтүү үчүн чектөөнү алып берем деп пара талап кылганы айтылат.

Бул факты боюнча Кылмыш-жаза кодексинин 343-беренеси (Опузалап пара алуу) менен кылмыш иши козголгон. Учурда Ош облустук милициясы тергеп жатат.

Кармалган жарандын жактоочусу же жакындары азырынча комментарий бере элек.