АКШнын Лос-Анжелес шаарынын тегерегиндеги токойлорду каптаган өрттөн кеминде 16 адам каза болду. Бул тууралуу Би-Би-Синин орус кызматы калаа бийлигинин маалыматына таянып кабарлады.

Тилсиз жоодон он миңден ашуун турак жай жана имараттар күйүп кетти. Жалпысынан өрт коркунучунда жашаган 180 миңдей киши коопсуз аймактарга көчүрүлгөн. Эвакуацияланган айрым аймактарда талап-тоноо болгондуктан кечкисин коменданттык саат киргизилди. Бийлик азырынча келтирилген чыгымды эсептеп бүтө элек.

Кыргызстандын Тышкы иштер министрлиги Лос-Анжелестеги өрттөн жабыркагандардын арасында кыргызстандыктар жок экенин билдирди. 

Лос-Анжелес аймагында токойлор 7-январдан кечинде өрттөнө баштаган. Тилсиз жоонун тез жайылышына катуу шамал дагы түрткү болууда.