"Манас" эл аралык аэропорту "Асман Эйрлайнс" мамлекеттик авиакомпаниясынын билеттери эмнеге кымбат болуп жатканына комментарий берди. Мекеменин басма сөз катчысы Алена Хоменко билеттин наркы сатып алынган орундардын санына жана суроо-талапка карап өзгөрүшү мүмкүндүгүн айтат.

"Билеттин баалары динамикалык бааларга байланыштуу. Канчалык көп орун брондолсо, суроо-талаптын өзгөрүшүнө жараша баалардын өзгөрүү ыктымалдыгы ошончолук жогору болот".

Мисалы, компаниянын сайтынан 27-сентябрга карата Ош-Бишкекке билет табылган жок. Ал эми 28-сентябрга ушул эле багытка үч орундун баасы төмөндөгүдөй: 

- "суперэконом" — 3200 сом; 

- "толук эконом" — 3700 сом;

- "флекс эконом" — 4200 сом.

Бул авиакомпания ачылганда ички каттамдарга билет баасы арзандап, Бишкектен Ошко, Раззаковго, Баткенге 3300 сом, ал эми Жалал-Абад, Казарман, Кербенге 3100, Таласка 2100 сомдон баштала турганы айтылган. Бирок, эки күндөн бери соцтармакта Бишкек-Ош каттамына билеттер ушул эле "Асман Эйрлайнста" 5000 сомдон чыгып жатканы жазылып жатат. 

"Асман Эйрлайнс" - Кыргызстандын алгачкы мамлекеттик авикомпаниясы. Ага Канададан Dash 8 Q400 үлгүсүндөгү учак алынган. Кыргыз өкмөтү алдыда дагы үчөө сатылып алынарын билдирген.