Жумгалда 15 күндөн бери мал кайтарганы кетип, дайынсыз болуп жаткан ата-баланы табууга учкучсуз учуучу аппараттар тартылды. Ички иштер министрлигинин басма сөз кызматы 30-октябрда маалымат таратып, бул жабдыктар жетүүгө кыйын болгон жерлерди жана кеңири аймактарды изилдөөгө жардам берерин белгиледи. 

Өзгөчө кырдаалдар министрлиги 30-октябрда издөө иштерине 104 адам чыкканын билдирди. Ага укук коргоо органдарынын кызматкерлери, ыктыярчылар жана жергиликтүү тургундар тартылган. 

Буга чейин президент Садыр Жапаров дайынсыз кеткен ата-баланы издөө иштерин күчөтүүнү тапшырган. 

45 жаштагы Болот Карыпбеков менен анын тогуз жаштагы баласы 16-октябрдан бери дайынсыз болууда. Жакындарынын айтымында, алар мал кайтарганы кетишкен. Ата-баланы 18-октябрдан тарта издеп баштаган. Натыйжа болбогон соң эртеси Өзгөчө кырдаалдар министрлигине кайрылышкан.