Ош шаарында бала бакчанын адиси акча талап кылууга шектелип кармалды. Бул тууралуу Ички иштер министрлиги 29-августта кабарлады. Бирок мекеменин атын ачыктаган жок. 

Министрликтин маалыматына караганда, Ош шаарынын тургуну кызын бала бакчага киргизгени барганда, андан мекеменин кызматкери 15 миң сом акча сураган. Аталган факт боюнча Кылмыш-жаза кодексинин 251-беренеси ("Кызматчынын сый акыны мыйзамсыз алуусу")менен кылмыш иши козголуп, шектүү 28-августта кармалган. 

Учурда соттук экспертизалар дайындалып, тергөө жүрүп жатканы айтылды. 

Расмий маалыматка ылайык Ош шаарында 67 бала бакча бар.