Президент Садыр Жапаров мал кайтарганы кетип, дайынсыз болуп жаткан Жумгалдын Өрнөк айылынын тургундарын издөө иштерин күчтөтүү тапшырмасын берди. Бул тууралуу президенттин басма сөз кызматы бүгүн, 28-октябрда билдирди. 

Издөөгө Өзгөчө кырдаалдар министрлиги менен Ички иштер министрлигинин кошумча күчтөрү тартылып, дрондор дагы колдонулат.

"Учурда издөө иштери Жалал-Абад облусунун Токтогул районунда да жүргүзүлүүдө. Анткени Көкөмерен дарыясы бул районго тез агып барат", -деп жазылат маалыматта. 

Мал кайтарганы кеткен 45 жаштагы Болот Карыпбеков жана анын тогуз жаштагы баласы 16-октябрдан беридайынсыз болууда. Жакындары аларды 18-октябрдан тарта издеп баштаган. Эртеси Өзгөчө кырдаалдар министрлигине кайрылышкан. Издөөгө айыл тургундары да кошулган. 

Ал эми Карыпбековдун апасы Жыпар Сыдыкова бийликтегилерге кайрылып, балдарын табууга жардам сурап жатат.