Пара алууга шектелип кармалган Оштогу Уркия Салиева атындагы лицейинин директору үй камагына чыгарылды. Бул тууралуу "Т-Медиага" 3-сентябрда облустук соттун маалымат кызматы тастыктады. 

Маалыматка караганда, Ош шаардык сотунун 2-сентябрдагы токтомунун негизинде Улуттук коопсуздук мамлекеттик комитетинин Оштогу башкармалыгынын тергөөчүсүнүн өтүнүчү канааттандырылган. Ага ылайык шектүү 28-октябрга чейин үй камагында болот. 

Атайын кызмат лицейдин жетекчиси 30-августта өзүнүн иш бөлмөсүндө пара алып жаткан жеринен кармалганын билдирген. Ага карата Кылмыш-жаза кодексинин 343-беренеси менен ("Опузалап пара талап кылуу") кылмыш иши козголуп, Тергөө башкармалыгына өткөрүлүп берилген.