Дарактар чаң соргуч сыяктуу булганган абаны өздөрүнө соруп алып, тазалап, көмүр кычкыл газын кычкылтекке айландырат. Чоң шаарларда бак-дарактар адамзатты ашыкча чаңдан жана машиналардан чыккан газдан коргойт.

Дени сак жана күчтүү дарактар көмүртекти (CO2) өзүндө сактаган кампа катары кызмат кылат. Көмүртек сактоо менен алардын климаттын өзгөрүшүн ооздуктоого жардамы чоң.

Бак-дарактар - канаттуулар, курт-кумурскалар, сүт эмүүчүлөрдүн, амфибиялардын, кемирүүчүлөрдүн үйү. Мисалы, бир эле түбүндө көп түрдүү жаныбарлар жашашы мүмкүн. Жада калса адамдар да үй курууда даракты колдонот.

Дарактардын алдына түшүп, чириген жалбырактар органикалык заттар менен топуракты байытат. Анын тамырлары топурактын түзүлүшүн жакшыртат жана сапатынын бузулушун алдын алат. Нымдуулуктун сакталышын да камсыз кылат. Дарактар топурактын пайдалуу заттарын өзүнө алып, жалбырактары түшкөндө кайра топуракка кайтарат. Ошондой эле анын шордуулугун азайтууга жардам берет.

Дарактар суу балансын көзөмөлдөөгө, суу ташкындарынын алдын алууга жана айлана-чөйрөнү гидраттуу кармоого да көмөкчү.

Бак-дарактар айлана-чөйрөгө көрк кошуп, көлөкө тартуулап, оюн-зоок жана эс алуу үчүн ыңгайлуу жерлерди камсыздайт.

Бак-дарактар көлөкө менен камсыз кылып, шаарларды салкын кылат. Өзгөчө ысык мезгилде.

Дарактардын жанында болуу адамдарга өзүн жакшы сезүүгө жардам берет. Стрессти азайтат жана психикалык ден соолукту жакшыртат.

Калифорниялык жубайлар Питер менен Тони Томпсон 2019-жылдын май айында менчигиндеги 180 жылдык эмен дарагын башка жерге көчүрүшкөн, натыйжада тамырлары кургап, дарак жашап кете алган эмес. Ал үчүн 586 миң доллар (52 341 520 сом) айып салынган. Дарактын ордуна алар үй курмак болушкан. Кийин Томпсондор 8,45 миллион долларга жалпы мүлкүн сатууну чечишкен.

Францияда бак-дарактарды кыйгандар үч кодекс (Шаар куруу, токой чарбасы жана экологиялык) менен жазаланат. Эң аз айып 1200 еврону (117 402 сом) түзөт. Шаар куруу кодексине ылайык, имарат курууда бак-дарактарды кыйган учурда мыйзам бузуучулар курулуш ээлеген аянттын ар бир чарчы метри үчүн 6000 евро (587 011 сом) төлөшү керек. Кайра кайталанган кылмыш үчүн айып пулдан тышкары алты айга чейин эркинен ажыратуу жазасы да белгилениши мүмкүн.

Бул өлкөдө дарак кыйгандарга 50-100 миң еврого (4-8 млн сом) чейин айып пул каралган. Даракты мыйзамдуу жол менен кыюу бюрократиялык жол-жоболорду сактоону талап кылат. Аны бузгандар 50 миң евро (4 890 939 сом) төлөйт. Жаратылышты коргоо мыйзамы марттан октябрга чейин айрыкча, канаттуулар уя салган же жаныбарлар жашаган дарактар үчүн бактарды кыюуга өзгөчө тыюу салат.