Айбек Молдогазиев Кыргызстандын АКШдагы элчиси болду. Тиешелүү жарлыкка өлкө башчы Садыр Жапаров 26-декабрда кол койду.

51 жаштагы Молдогазиев бул кызматка чеиймн тышкы иштер министринин орун басары кызматында иштеген. Бул кызматты ал 2022-жылдын февралынан бери аркалап келген.

Айбек Молдогазиев 1995-жылы Жусуп Баласагын атындагы Кыргыз улуттук университетинин юридика факультетин аяктаган. Ал эмгек жолун ТИМдин Келишимдик-укуктук департаментинин атташеси катары баштаган. Андан кийин Кыргызстандын Бириккен Улуттар Уюмундагы туруктуу өкүлчүлүгүндө 1-катчы, ТИМдин Эл аралык-укуктук департаментинин жетекчиси, президенттик администрациянын тышкы саясат бөлүмүнүн башчысы болуп иштеген.

Ошондой эле аталган министрликтин бир нече департаменттерин жетектеген.

Буга чейин Кыргызстандын АКШдагы элчиси Бактыбек Аманбаев болгон. Аны президент 25-октябрда кызматтан бошоткон.