Акжол Махмудов Париж Олимпиада оюндарында коло байгени утту.Кыргыз спортчусу коло үчүн  азербайжандык Санан Сулейманов менен күч сынашып, аны 6:5 эсебинде жеңип алды.

Муну менен ал Кыргызстандын куржунуна үчүнчү медалды алып келди. 

Чейрек финалда Махмудов казак балбаны Демеу Жадраев менен  беттешип, 3:1 эсебинде утулуп, жарым финалга өтпөй калган. Ага чейин балбан биринчи атаандашы Камал Амир Бейди 4:1 эсебинде жеңген болчу. 

25 жаштагы Акжол Махмудов - грек-рим күрөшүнөн Токио Олимпиадасынын күмүш медалынын ээси, Дүйнөнүн эки жолку, Азиянын үч жолку чемпиону. Эл аралык ондогон мелдештерде байгелүү орундарды жеңген.

Дагы бир кыргызстандык спортчу Үзүр Жузупбеков бүгүн, 8-августта коло үчүн күч сынашат. Анын атаандашы египеттик Мохамед Габр.

Учурда Парижде жайкы Олимпиада өтүп жатат. Буга чейин кыргызстандын эки балбаны кыз-келиндер күрөшүнөн Мээрим Жуманазарова күмүш, грек-рим күрөшүнөн Жоламан Шаршенбеков коло байге уткан.