Борбордук "Ала-Тоо" аянтын оңдоо иштеринин 90%ы бүтүп калды. Бул тууралуу "Т-Медиага" мэриянын маалымат кызматынын жетекчиси Назгүл Жамгырчиева билдирип, жумуштар 31-августка чейин аяктай турганын белгиледи.

31-августта "Ала-Тоо" аянтында Кыргызстандын эгемендүүлүгүнүн 33 жылдык мааракесине жана Кара-Кыргыз автономиялуу облусунун түзүлгөндүгүнүн 100 жылдыгына арналган майрамдык салтанаттар уюштурулат. Жамгырчиева аянтка курулуп жаткан жаңы фонтандар ал күнү ишке берилип-берилбешин тактаган жок. Ал эми реконструкция иштерине жумшалган каражат жумуш толук бүткөндөн кийин эсептелип чыгып, жарыяланат. 

Буга чейин вице-мэр Азамат Кадыров борбордук аянттагы жумуштар 31-августта аяктай турганын билдирген. 

"Ала-Тоо" аянтын реканструкциялоо иштери 27-апрелде башталган. Анын азыркы композициясын "Бишкек башкы архитектура" муниципалдык ишканасы иштеп чыкканы маалым.