Быйыл Кыргызстандыктарга Сауд Арабиясы ажылыка баару үчүн 6060 квота бөлдү. Муфтият бул расмий квота экенин, дагы кошумча орун сураганын билдирди. 

Мындай чечим ажылыкты уюштуруу штабынын төрагасы Самидин Атабаев, КМДБнын ажылык-умра бөлүмүнүн башчысы Жолдошбек Абдылдаев жана КМДБнын ажылык-умра бөлүмүнүн адиси Дастан Нукуновдун Сауд Аравия Падышачылыгынын ажылык министрлигинин алдындагы ажылыкты уюштуруу башкы башкармалыгынын директору Бадир Ал-Сулами менен болгон жолугушуусунда айтылды.

Ажылык сапарына барчуларды каттоо 9-ноябрдан башталып, 20-ноябрга чейин уланат. Буга чейин, муфтият меккеге бара тургандар ID-карта менен электрондук каттодон өтүп, баштапкы төлөм катары банк аркылуу 2 миң доллар төлөшү керек экенин кабарлаган. Ал эми сапардын жалпы баасы азырынча тактала элек.