Ички иштер министрлигинин басма сөз кызматынын маалыматына ылайык,  денесинен жаракат алган эки жашар кыз 7-июнь күнү Баткен облустук ооруканасынын сыныктар бөлүмүнө жаткырылган. 

"Чогулган материалдын негизинде Кылмыш-жаза кодексинин 138-беренеси ("Уруп-сабап кыйноо") менен кылмыш иши козголду. Арызды наристенин таянеси жазган. Окуяга шектүү катары 40 жаштагы Баткен районунун Бужум айылынын тургуну кармалып, убактылуу кармоо жайына киргизилди", -деп билдирди ИИМ. 

Ал эми Саламаттык сактоо министрлиги эки жаштагы кыз учурда жасалма дем алдыруу аппаратына туташтырылып, комада жатканын "Т-Медиага" маалымдады.

Министрлик кошумчалагандай, буга чейин Баткен облустук милициясына оорукана дарыгери байланышып, эки жаштагы кыз эс-учун жоготкон абалда жандандыруу бөлүмүнө түшкөнүн  кабарлаган. Наристе церебралдык шал оорусу (ДЦП) менен төрөлүп баспагандыктан, ата-энеси бир нече ирет бастырууга аракет кылган. Бирок баса албай жерге баш тарабы менен бир канча ирет кулап, андан кийин тилин тиштеп, эс-учун жоготуп койгон. Ага карата кимдир бирөөлөр тарабынан зордук-зомбулук аракеттер же уруп сабоолор болбогондугу аныкталган.

Кыздын денесиндеги алган жарааттардын оордугун тактоо үчүн соттук-медициналык экспертизалар дайындалган. Ал эми анын апасы менен атасы бул боюнча милицияга арыз менен кайрылган эмес.