Билим берүү жана илим министрлиги Кыргызстанда президенттик “Эл үмүтү” эл аралык стипендиясына кабыл алуу башталганын билдирди.

Аталган стипендияга документтерди кабыл алуу онлайн түрүндө 1-майда башталып,  30-майга чейин жүрөт.

"Эл үмүтүн" алуу үчүн магистратурага тапшырган 40 жашка, докторантурага 45 жашка чейинки Кыргызстандын жарандары талапкер боло алышат.

Өткөн жылы аталган стипендияны 17 жаран утуп алган. Алардын 2023-2024-окуу жылында дүйнөдөгү 100 эң мыкты университетке кирген окуу жайларда окуп магистр жана доктор даражасын алуусу үчүн президенттик фонддон 60 миллион сомдой каражат бөлүнгөнү кабарланган. 

2022-жылы аталган стипендияны утуп алган тогуз кыргызстандыкка президенттик фонддон 30 млн сом берилген.

Кыргызстанда "Эл үмүтү" аттуу эл аралык стипендиялардын жаңы программасын ачуу тууралуу жарлыкка президент Садыр Жапаров 2022-жылы 10-майда кол койгон.