“Кыргызкөмүр” мамлекеттик ишканасынын түштүк филиалынын мурдагы жетекчиси Ж.М.Ш. кызмат абалынан кыянаттык менен пайдаланууга шектелип кармалды. Бул тууралуу Улуттук коопсуздук мамлекеттик комитетинин басма сөз кызматы 6-декабрда кабарлады. 

 Атайын кызмат тараткан маалыматта ал мөңгүлөрдү талкалап, тиешелүү органдар менен макулдашпастан Оштун Кара-Суу районундагы "Загара-2" кенине автожол курууну баштаганы айтылат.

"Мекеменин түштүк филиалынын жетекчилиги "Кыргызгипрозем" ишканасына пландалган жол куруу багыты боюнча координаталык чекиттерди көрсөтүү менен жер жөнүндө түшүндүрмө алуу үчүн кайрылган. Ошондой эле "Загара-2" кенинде экологиялык экспертизанын оң корутундусун алуу үчүн Экологиялык жана техникалык коопсуздук боюнча Ош аймактык башкармалыгына бир нече жолу кайрылган. Бирок аталган башкармалык экспертизанын корутундусун макулдашуудан баш тарткан” -деп айтылат билдирүүдө.

 Жыйынтыгында 14 миллион 978 миң 480 сомдук экологиялык зыян боюнча корутунду алынган. Ал эми "Кыргызкөмүр" мамлекеттик ишканасынын түштүк филиалынын жетекчиси Кылмыш-жаза кодексинин 337-беренеси (“кызмат абалынан кыянаттык менен пайдалануу”) жана 298-беренеси “Иш жүргүзүүдө айлана-чөйрөнү коргоо эрежелерин бузуу”) менен айыпталып кармалган. Учурда УКМКнын убактылуу кармоочу жайына камакка алынган.

Атайын кызмат тараткан Ж.М.Ш. инциалдары быйыл октябрь айында кызматтан алынган Муктарбек Жолдошовдин аты-жөнүнө туура келет.