Варна шаарында өткөн эл аралык Балкан математикалык олимпиадасында кыргызстандык окуучулар бир күмүш, үч коло медалга жана эки ардак грамотага ээ болушту. Бул тууралуу 6-майда Билим берүү жана илим министрлиги билдирди. 

Маалыматка караганда, күмүш медалга "Газпром Кыргызстан" мектебинин 8-классынын окуучусу Ян Бобрус, колого ушул эле мектептин 10-классынын окуучулары Нурсултан Эшперов, Сейит Рыскулов жана Б.Якирдин атындагы №61 автордук физика-математикалык мектеп-лицей окуу комплексинин 10-классынын окуучусу Нурдөөлөт Капаров ээ болгон. 

Ардак грамота менен ушул эле мектеп-лицейдин 10-классынын окуучулары Назар Киргизбаев жана Айдин Асанкадыров сыйланышты. 

Бул окуучуларды олимпидага математика мугалими Мамат Ишматов даярдаган.

41-Балкан математикалык олимпидасы (BMO 2024) 27-апрелден 2-майга Болгариянын Варна шаарында өткөн. Ага 22 өлкөнүн окуучулары катышкан.