Мурдагы билим берүү министри Алмазбек Бейшеналиев Кылмыш-жаза кодексинин "Кызмат абалынан кыянаттык менен пайдалануу" беренеси боюнча күнөөлүү деп табылып, 1,5 миллион сом төлөп берүүгө милдеттендирилди. Мындай чечимди Бишкектин Биринчи май райондук соту 22-апрелде чыгарган. 

Райондук соттун басма сөз кызматынын 11-июлда "Т-Медиага" берген маалыматы боюнча, Бейшаналиев мындан сырткары үч жылдык мөөнөткө мамлекеттик кызматта иштөө укугунан ажыратылды.

Алмазбек Бейшеналиев 2022-жылы сентябрда кармалган. Ички иштер министрлиги аны "жогорку окуу жайлардын бирине чет элдик студенттерди кабыл алуу үчүн 110 миң доллар пара алган" деп айыптаган.

Экс-министр күнөөсү жоктугун айтып, конверттеги акча билим берүү тармагына инвестиция үчүн берилгенин белгилеген.