Ноокатта Улуу Ата мекендик согуштун жалгыз ардагери Карабай Бозорбоев 99 жашында дүйнөдөн кайтты. Бул тууралуу 30-апрелде президенттин Ош облусундагы өкүлчүлүгү билдирди. 

Бозорбоев Ноокат районунун Мирмахмудов айылдык аймагынын Чапаев айылында туулган.
Согушка 1943-жылы 18 жашында кеткен. Ленинград шаарында согушта болуп, кийин каармандыгы үчүн орден, медалдар менен сыйланган. Жаракатынан улам экинчи топтогу майыптык алган.

1948-жылы Кыргызстанга кайтып келгенден кийин Чапаев колхозунда эмгектенген. Маркум ардагердин артында төрт уулу, эки кызы, 20 небереси, 70 чөбөрөсү, төрт кыбырасы калды.

1941-1945-жылдары согушка Кыргызстандан 360 миңдей адам катышкан. Алардын 90 миңден ашыгы фронтто курман болгон.