Ош облустук соту Жогорку Кеңештин мурдагы депутаты Өмүрбек Бакировду 2021-жылкы парламенттик шайлоодо добуш сатып алган деген айып боюнча күнөөлүү деп тапты. Мындай өкүм 7-мартта чыккан. Бул тууралуу мекеменин басма сөз катчысы Адила Сулайманкулова "Т-Медиага" билдирди.

2023-жылдын 26-декабрда ушундай эле өкүмдү Ноокат райондук соту чыгарган. Кийин Бакировдун жактоочусу Назгүл Сүйүнбаева райондук соттун чечимине каршы Ош облустук сотуна апелляциялык арыз менен кайрылган. 

2023-жылы 26-августта Боршайком Өмүрбек Бакировду депутаттык мандатынан ажыратып, күбөлүгүн жокко чыгарган. 18-августта Өмүрбек Бакиров шайланып келген №4 Көк-Жар округу боюнча шайлоонун жыйынтыгын жокко чыгарган чечимди Жогорку Сот да күчүндө калтырган. Бакиров бул чечимди мыйзамсыз деп атаган.

Бакировду 29-августта Ош облустук милициясы кармап кеткен. Анда 2021-жылдагы шайлоодогу добуш сатып алуу ишинин негизинде сурак берген. Анын адвокаты мандатынан ажыраган депутат дооматтарды четке какканын билдирген.

2021-жылы 28-ноябрда өткөн аралаш системадагы шайлоодо Өмүрбек Бакиров парламентке депутат болуп шайланган. Талапкерлердин бири Равшанбек Рысбаев 2022-жылдын декабрында сотко кайрылып, Өмүрбек Бакиров шайлоодо добуш сатып алды деген жүйө менен анын мандатын жокко чыгарууну суранган.