№7 Ош бир мандаттуу шайлоо округу боюнча Жогорку Кеңештин депутатын мөөнөтүнөн мурда шайлоого 25-мартка карата эч ким арыз бере элек. Бул тууралуу "Т-Медиага" Борбордук шайлоо комиссиясынан билдиришти.  

Ал эми Баткен бир мандаттуу шайлоо округу боюнча тогуз талапкер, Кара-Суудан сегиз талапкер арыз берген. 

Талапкерлердин арыздарын кабыл алуу 28-мартка чейин уланып, аларды каттоо 8-апрелге чейин жүрөт. Үгүт иштери 8-апрелден 27-апрелдин таңына чейин жүргүзүлөт.

Президент Жапаровдун жарлыгы менен №2 Баткен, №9 Кара-Суу  жана №7 Ош бир мандаттуу шайлоо округдары боюнча Жогорку Кеңештин депутаттарын мөөнөтүнөн мурда шайлоо 28-апрелге белгиленген.

Борбордук шайлоо комиссиясы 13-мартта №7 Ош бир мандаттуу шайлоо округунан шайланып келген Жогорку Кеңештин депутаты Айбек Осмоновдун мандатын өзүнүн арызынын негизинде алганын жарыялаган.

Ал эми 22-февралда Бажы кызматынын төрагасынын мурдагы орун басары Райымбек Матраимовдун агасы Искендер Матраимов менен Нурлан Ражабалиевди өздөрү жазган арыздын негизинде депутаттык мандатынан ажыратылган.