Ош облусуна прокурор болуп Чыңгыз Ахматов дайындалды. Ал эми Ош шаарына Бакытбек Сыдыгалиев прокурор болуп келди. Бул тууралуу Башкы прокуратуранын басма сөз кызматы кабарлады. 

Алар башкы прокурор Максат Асаналиевдин 12-июндагы буйругунун негизинде дайындалышкан. 

Чингиз Ахматов эмгек жолун 2004-жылы Талас облусунун прокуратурасынан баштаган. Кийин Башкы прокуратурада, Жалал-Абад, Ош облустарынын прокуратураларында түрдүү кызматтарда иштеген. Чүйдүн Токмок шаарында, Ысык-Ата районунда эмгектенген. Учурдагы кызматка дайындалганга чейин Баткендин Кызыл-Кыя шаарынын прокурору болуп турган.  

Ал эми Бакытбек Сыдыгалиев эмгек жолунда Ысык-Көл, Чүй облустарында, Балыкчы, Таш-Көмүр шаарларында жана Сузак, Базар-Коргон райондорунда эмгектенген.