Парламент бүгүнкү, 20-ноябрдагы жыйынында жолдорду оңдоо үчүн күйүүчү майдын ар бир литиринен 1 сомдон алуу мыйзам долбоорун экинчи, үчүнчү окууда колдоп берди. 

Мыйзам долбоорго ылайык, айдоочулар ар бир литр бензин, дизелдин баасына 1 сомдон кошуп төлөйт. Ал каражат Жол фондуна топтолуп, жолдор оңдолору айтылган. Транспорт министрлиги  документти алгач сунуштаганда "жолду-ким көп унаа айдаса, ошол бузат" деген жүйө келтирген. 

Жогорку Кеңештин төрагасы Нурланбек Шакиев аталган  мыйзам долбоору каралып жаткан учурда сөз сүйлөп, 2027-жылдан тарта бардык айылдарга, жайлоолорго кеткен жолдорго асфальт төшөлөрүн билдирди. 

"Бюджеттен акча бөлүнбөйт, Жол фондунан гана алынат. Кечээ бул тууралуу президент менен сүйлөштүк",-деди Шакиев.

Мындан сырткары ал 1250 даана  транспорт тармагында иштей турган техника алынып келерин, алардын 750сү Жол фондуна түшкөн каражаттын эсебинен алынганын кошумчалады. 

Парламент бул мыйзам долбоорду 3-октябрдагы жыйынында биринчи окууда талкуусуз кабыл алган.