Өлкө башчы Садыр Жапаровдун 11-июлдагы жарлыгына ылайык, президенттин Жалал-Абад облусундагы ыйгарым укуктуу өкүлү Абсаттар Сыргабаев кызматтан бошотулуп, транспорт жана коммуникациялар министринин милдетин аткаруучу болуп дайындалды.

Ал эми мурдагы транспорт министри Тилек Текбаев  президенттин Жалал-Абад облусундагы ыйгарым укуктуу өкүлү болуп дайындалды. 

Эми алардын талапкерлиги Жогорку Кеңешке макулдашууга жөнөтүлөт. Учурда депутаттар каникулда.

47 жаштагы Тилек Текебаев Бишкек шаарында туулган. Ал 2000-жылы Насирдин Исанов атындагы Кыргыз мамлекеттик курулуш, транспорт жан архитектура университетин инженер-механик адистиги боюнча аяктаган. Текебаев министр кызматына келгенге чейин Ош шаардык архитектуралык-курулушту көзөмөлдөө башкармалыгынын жетекчиси болгон.

Ал эми Абсаттар Сыргабаев 48 жашта. Жалал-Абад облусунун жетекчиси кызматына 2020-жылы октябрда келген. 2020-жылы жыйынтыгы жокко чыккан парламенттик шайлоодо "Мекенчил" партиясынан талапкер болгон. Ага чейин Сузак районунун Барпы айыл өкмөтүнүн башчысы болуп иштеген.