Бишкектин Биринчи Май райондук соту "Украинадагы согушка катышкан" деген айып менен он жылга соттолгон Аскар Кубанычбек уулун жети жылга соттоп, үч жылдык пробациялык мөөнөт менен сот залынан бошотту.

Ага Кылмыш-жаза кодексинин 416-беренеси "Жалданмачылык" менен кылмыш иши козголгон.

Эске салсак: былтыр 16-майда Бишкектин Биринчи май райондук соту аны 10 жылга соттогон. Апелляциялык арызды караган Бишкек шаардык соту 7-июнда ушул эле чечимди күчүндө калтырган. Өкүмдө Москвада жашап жүргөн кыргыз жараны 2022-жылдын июнь айында “материалдык пайда табуу үчүн” Орусиянын аскердик топторунун бирине кошулуп, Украинадагы согушка катышканы айтылат.

Улуттук коопсуздук боюнча мамлекеттик комитети бул жаранды былтыр январда кармап камаган.