Өзбекстандан Ош шаарына 21-мартка чейин жүз автобус келет. Алгачкы партиясы 16-мартта жеткирилгенин мэриянын басма сөз кызматы билдирди. Автобустардын ар бири 89 миң 500 долларга бааланып, 25 орунга ылайыкташкан.

Мэриядан кабарлашкандай, автобустар Кыргыз-өзбек өнүктүрүү фондунун эсебинен беш жылдык мөөнөткө лизинг менен алынып жатат. Алар "СамАвто" заводунан алынып келинүүдө.

Автобустарды сатып алууга Ош шаардык кеңеши 2023-жылдын 28-декабрдагы сессиясында макулдук берген. Бирок айрым депутаттар коомдук транспорттор дизель майы менен жүргөндүктөн абаны булгайт деген пикирин айткан. 

Буга чейин дагы 2022-жылы Ош мэриясы өзбекстандык "СамАвто" автозаводунан элүү автобус сатып алган. Алардын баасы 37 миң доллардан бааланган. Бирок кийин көп өтпөй сапаты жакшы делген автобустардын сегизи бузулуп, өндөп-түзөөгө муктаж экени кабарланган.