Өзгөн шаарынын борбордук базарынын дээрлик 11 миң чарчы метрди түзгөн жери жеке жактарга 87 млн сомго мыйзымсыз сатылып кеткени аныкталды. Учурда аталган жер тилке мэриянын балансына өткөрүлүп берилгенин 19-октябрда Башкы прокуратурадан билдиришти. 

“Прокуратура тарабынан жогоруда аталган жер тилкесинин сатуу-сатып алуу келишимин жараксыз деп табуу жөнүндө сотко доо арыз келтирилип, толук канааттандырылды. Жыйынтыгында Өзгөн шаардык мэриясынын балансына алынып, мамлекеттик каттоо органы тарабынан тийиштүү мамлекеттик акты берилди”, -деп билдирди башкы көзөмөл органы.

Өзгөн шаардык мэриясынын өкүлү Манас Койчукуловдун “Т-Медиага” билдиришинче, жеке колго өтүп кеткен жер тилке мурун өрт өчүрүүчү унаалар кирген негизги жол болгон.