Жалал-Абаддын 400 тонна жаңгагын  Түркияга сатуу боюнча келишим түзүлдү. Бул тууралуу Экономика министрлигинин Түркиядагы соода өкүлү Чыңгыз Токтобеков билдирди. 

Аталган келишим Анкарада өткөн Кыргыз-Түрк соода-экономикалык жыйынында түзүлүп, алуучу тараптан Araz group компаниясы кол койду.

Токтобековдун айтымына караганда, биринчи партиясы 15-февралда экспортко жөнөтүүгө даярдалууда. Мындан башка дагы түркиялык эки компания менен 400 тонна жаңгак сатуу боюнча сүйлөшүү жүрүүдө.

Эске салсак, 9-февралда Анкара шаарында 11-өкмөттөр аралык Кыргыз-Түрк соода-экономикалык жыйыны болуп өттү. Отурумдун жыйынтыгы боюнча 62 пунктан турган Комиссиянын жыйынынын протоколуна, эл аралык унаа жолдору боюнча макулдашууга жана экспорт тармагында меморандумга кол коюлган.