Нарын облусунун Жумгал районунун Өрнөк айылында баласы менен мал кайтарууга кеткен бойдон дайынсыз болуп жаткан Болот Карыпбековдун сөөгү табылды. Бул тууралуу "Т-Медиага" Өзгөчө кырдаалдар министрлигинин басма сөз катчысы билдирди. Маалыматка караганда, маркумдун сөөгүн айылдаштары бүгүн, 14-ноябрда айылдын этек жагынан, суудан табышкан. 

Карыпбековдун сөөгү Ички иштер министрлигинин кызматкерлерине өткөрүлгөн. Анын тогуз жаштагы баласы табыла элек.

ӨКМ издөө иштери кыскартылганын 13-ноябрда кабарлап, мындан ары жумасына эки жолу издөө жүргүзүлүп турарын маалымдаган болчу.

45 жаштагы Болот Карыпбеков менен анын тогуз жаштагы баласы 16-октябрдан бери дайынсыз болуп жаткан. Жакындарынын айтымында, алар мал кайтарганы кетишкен. Ата-баланы 18-октябрдан тарта издеп баштаган. Натыйжа болбогон соң эртеси Өзгөчө кырдаалдар министрлигине кайрылышкан.