Кара-Суу районунун Отуз-Адыр айылында беш жаштагы кызды зордуктоого шектелген жаран эки айга камалды. Чечимди Ош облустук соту 17-апрелде чыгарганын мекеменин маалымат кызматы "Т-Медиага" билдирди.

Шектүү 15-июнга чейин райондук ички иштер бөлүмүнүн убактылуу кармоочу жайында кармалат.

Окуя Отуз-Адыр айылында 15-апрель күнү эртең менен болгон. Милиция бул факты боюнча "Адам уурдоо" жана "Сексуалдык мүнөздөгү зомбулук аракеттер" беренеси менен иш козгоп, кызга соттук-медициналык экспертиза дайындалган.

16-апрелде Отуз-Адырдын жүздөй тургуну айылдагы маданият үйүнө топтолушуп, "аймактык милиция окуядан кабардар болсо да, кеч аракет кылган" деп нааразы болушкан. Ошондой эле алар кылмышты дыкат иликтөөнү жана шектүүнү жазалоону талап кылышты.