ЖМКлар жактоочу Самат Матцаковдун кармалганын жазышууда. Мурдараак укук коргоочу Азиза Абдирасулова Матцаковдун үйүндө Улуттук коопсуздук мамлекеттик комитетинин кызматкерлери тинтүү жүргүзүп жатканын соцтармактагы баракчасына билдирген.

Матцаков журналисттердин суроолоруна жооп берип жатып, ага «Алдамчылык» беренеси менен кылмыш иши козголгонун айтты. Ал үйүндөгү тинтүүдөн кийин тергөөчүлөр Имамидин Ташовдун ишине байланышы бар төрт дискти алып кетишкенин кошумчалады.

Атайын кызмат бул тууралуу расмий комментарий бере элек.

Самат Матцаков камакта жаткан KG Group курулуш компаниясынын ээси Имамидин Ташовдун адвокаты. Ошондой эле журналист Актилек Капаров, акын Аскат Жетигендин да укуктарын коргоп жүрөт.